منوعات

هتسألني ليه، هقولك عشان الراجل ده شغال حاليًا وبيقرب من إنه يبتكر نوع جديد من التصوير، أعلى من تصوير الفيمتوثانية اللي ابتكره أحمد زويل.. التصوير ده ه

 Attosecond Microscopy عالم مصرى يخترع تكنولوجيا التصوير الاتوثانية الميكروسكوبى 

العالم د.محمد ثروت حسن إبن مصر وفخر مصر

الراجل ده عالم مصري، وقريب هيبقى حرفيًا واحد من أهم علماء الفيزياء في العالم، وهيكمل طريق د. أحمد زويل اللي كان واخد جايزة نوبل 

هتسألني ليه، هقولك عشان الراجل ده شغال حاليًا وبيقرب من إنه يبتكر نوع جديد من التصوير، أعلى من تصوير الفيمتوثانية اللي ابتكره أحمد زويل.. التصوير ده هيعمل فرع جديد تمامًا من العلوم الفيزيائية، هيكون اسمه (تصوير الآتو ثانية الميكروسكوبي Attosecond Microscopy)

كنولوجيا تخلينا نشوفها لأول مرة دي، ف يكفي إني أقولك إن الآتو ثانية دي هي تعادل حوالي مليار من المليار من الثانية الواحدة يعني ١٠ أس سالب ١٨ من الثانيةيعني بشكل رياضي دقيق، حوالي (واحد من كوينتيليون من الثانية one-quintillionth of a second)

طب يعني ايه الأرقام دي؟ يعني عشان أقربها لفهمنا البشري الضعيف، النسبة ما بين الآتو ثانية والثانية العادية، هي زي الفرق ما بين الثانية العادية وحوالي ٣١.١٧ مليار سنة

يعني زي كإنك بتقارن ما بين (ثانية واحدة) من الثواني اللي بتعدي عليك وانت بتقرا السطور دي، وعدد من السنين يقدر بأكتر من ضعف عمر الكون بتاعنا كله

هقولك حاجة كمان.عارف الضوء؟ عارف سرعته اللي هي تعتبر أقصى سرعة في الكون، والحد الكوني لأقصى سرعة ممكن يوصلها أي شيء سواء مادي أو غير مادي؟سرعته اللي هي حوالي ٣٠٠ ألف كيلومتر ف الثانية إلا حاجات بسيطة

أهو الضوء ده نفسه بيمشي مسافة تقدر بحوالي واحد على الألف (١/١٠٠٠) من عرض الشعرة البشرية، في فترة زمنية قدرها (٥٣ آتو ثانية)

 التكنولوجيا دي لأول مرة في التاريخ هتخلينا نقدر نشوف ونصور حركة الإلكترونات نفسها حوالين الذرة بشكل دقيق، ونصور فيديو للحركات الديناميكية اللي بتحصل جوه الذرات نفسها يعن احنا هنقدر نبص على المكونات اللي بتكون الواقع والنسيج بتاع الكون بتاعنا كله، ونشوفها وهي بتتحرك 

هو الأستاذ العظيم محمد ثروت حسن، خريج بكالوريوس قسم الفيزياء في كلية العلوم بجامعة القاهرة سنة ٢٠٠٣ وبعدها خد الماجيستير في نفس الجامعة سنة ٢٠٠٨.كل ده لحد هنا طبيعي ومش مبهر أوي

المبهر بقى فعلًا هو اللي عمله الراجل ده بعدها، لما جتله منحة سنة ٢٠٠٩ وسافر ألمانيا عشان يدرس، لحد ما سنة ٢٠١٣ خد درجة الدكتوراه أو ال Ph.d في التصوير الكمي Quantum Optics من واحدة من أكبر المؤسسات العلمية الفيزيائية في العالم، اللي هي مؤسسة ماكس بلانك Max Planck Institute of Quantum Optics

وساعتها كان بالفعل شغال على الأبحاث بتاعته عشان يطور التصوير الضوئي باستعمال تقنيات الليزر المتقدم، عشان يصور الآتو ثانية دي.. زي ما عمل قبله الدكتور أحمد زويل لما صور الفيمتو ثانية، وفاز بجايزة نوبل.. وفعلًا الراجل ده قدر انه يعمل تطويرات على الميكروسكوب رباعي الأبعاد 4D Microscopy اللي بيستعملوه في الحاجات دي، وزود كفاءته ١٦ مرة

بس كان لسه عنده طموح لأكتر وأكتر

وفي مرة، كان بيدي محاضرة في جنيف ف سويسرا سنة ٢٠١٢ عن أبحاث الدكتوراه بتاعته، وعرف إن د. زويل كان المفروض انه يدي محاضرة ختامية للمؤتمر. ف اتواصل معاه وطلب منه يحضر المحاضرة بتاعته بس د. زويل اتأخر ومحضرهاش، لكن بعدها تواصل معاه فعلا واتكلموا مع بعض كتير وده كان بالنسباله كإنه حلم اتحقق، عشان هو كان سبب دخوله كلية العلوم اصلا انه كان نفسه يبقى زي د. زويل 

وبعدها الحلم اتحقق وبقى خيال حرفيًا عشان د. زويل بعدها طلب منه انه ييجي يشتغل معاه ف الفريق بتاعه ف أكبر مؤسسة بحثية في العلوم والفيزياء في أمريكا، اللي هي مؤسسة كاليفورنيا للعلوم والتكنولوجيا أو اللي بيسموها (كالتك CalTech)

وساعتها د. ثروت بقى تلميذ د. زويل والمصري الوحيد اللي في الفريق بتاعه.. ومع بعض عملوا اكتشافات كتير، وشارك في كذا ورقة بحثية ضخمة معاه اتنشروا ف اتنين من أكبر المجلات العلمية في العالم اللي هما نيتشر Nature:

https://www.nature.com/articles/nphoton.2017.79

و Science Magazine هنا:

https://science.sciencemag.org/content/355/6324/494.full

ده غير الأوراق البحثية العظيمة اللي قدمها لوحده.

تخيل انت يبقى حلمك انك تقابل واحد من أعظم علماء العالم زي د. زويل، وتدخل كلية العلوم عشان تحقق الحلم ده، وبعدين مع الوقت توصل لإنك مش بس تسلم عليه، لأ كمان تشتغل معاه وتتعلم منه وتكتب معاه أوراق بحثية ضخمة، وكمان تطور وسيلة هتقدر تخليق تتفوق على اكتشافه كمان 😀

يا راجل ده حقق حلم د. أحمد زويل ودخل هو كمان في موسوعة جينيس 

عشان مؤسسة جينيس كانت مسجلة ليزر الفيمتو ثانية كأسرع ليزر ضوئي معروف في العالم، وجه هو بابتكار الآتو ليزر وخد الجايزة بعد أحمد زويل، وبقى اسمه هو كمان متسجل في الموسوعة كمبتكر أسرع ليزر ضوئي معروف في التاريخ

بعدها الراجل ده فاز بكذا جايزة وتمويلات كتير للأبحاث بتاعته.. منهم مثلًا جايزة مؤسسة كيك الأمريكية للعلوم والتكنولوجيا Keck Institute for Science and Technology.. الجايزة دي قيمتها ١.١ مليون دولار أمريكي.. وفي الطبيعي هي بيدوها لفرق بحثية كبيرة فيها ناس كتير عشان يقسموها بينهم.. بس الراجل ده خدها لوحده في حالة نادرة فعلًا انها تحصل، وبتوريك قد ايه هو البحث بتاعه مهم بالنسبالهم هناك 

ده غير إنه بعد ما د. زويل مات سنة ٢٠١٦، راح واشتغل في جامعة أريزونا، وعمل فريق بحثي فيه باحثين من الصين وأمريكا والكويت ومصر، وسنة ٢٠١٩ فاز بردو بجايزة أفضل الباحثين الشباب في الولايات المتحدة الأمريكية، مقدمة من القوات الجوية الأمريكية. الجايزة اسمها بالظبط:

The Air Force's Young Investigator Award- 2019

وكمان قبلها بسنة، ف ٢٠١٨، فاز بجايزة ومنحة من مؤسسة جوردون وبيتي موور للأبحاث.. واسمها أهو:

The Gordon and Betty Moore Foundation Grant Award- 2018

.

تخيل انت اللي انا بحكيهولك ده

الراجل ده حرفيًا ماشي على طريق جايزة نوبل ده بيقولك خلاص ف خلال سنة ولا حاجة، هيبتكر تكنولوجيا تخليك تشوف الإلكترون وهو بيتحرك أنت متخيل انا بقولك ايه؟ طب متخيل التطبيقات التكنولوجية وأبواب العلوم اللي هتتفتح بعد حاجة زي دي هتبقى عظيمة قد ايه؟

ده جايزة نوبل ممكن تقفل بعده 

ده بروفايل د. ثروت في جامعة أريزونا، فيه درجاته العلمية وطرق التواصل معاه وإيميله ورقم تليفونه، وكمان بعض أوراقه البحثية:

https://w3.physics.arizona.edu/people/mohammed-hassan

وده لينك تاني من مؤسسته البحثية وانجازاته وتعليمه:

http://www.optics.arizona.edu/.../mohammed-tharwat-hassan

الراجل ده كالعادة عالم مصري كبير وبيتم تقديره في دول العالم كلها راجل داخل موسوعة جينيس، وبيتم دعمه بمنح بحثية ضخمة مقدمة من أكبر مؤسسات بحثية في العالم بس لو سألت عنه أي شخص في الشارع، هيقولك مين محمد ثروت ده؟

محمد ثروت ده ممثل باين؟

 

يا رب ييجي اليوم اللي أشوف فيه بلدنا بتهتم بالعقليات العلمية الأسطورية، اللي مكسرة الدنيا بره مصر دي.. نفسي ف يوم أشوف العلماء عندنا بقوا نجوم مجتمع زي دول العالم الأول ولك في ستيفن هوكينج وأينشتاين وريتشارد فاينمان وغيرهم كتير مثال

ولحد وقتها، مفيش ف إيدي حاجة غير اني أفضل مستمر على مشروع تبسيط العلوم بتاعي ده، وأحاول على قد ما أعرف أسلط الضوء على العلماء المصريين الكبار اللي محدش يعرف عنهم حاجة جايز في يوم ألاقي ان في حاجة بتتغير 

يا ريت تشيروا قصة د. ثروت في كل حتة لو تقدروا، وتعملوا منشن لأصحابكم وحبايبكم يقرأوا معاكم ويتبسطوا خلونا نعرف المصريين اللي يشرفوا دول، ونتشرف بيهم وبجنسيتنا وتاريخنا

الشير بيساعد في نشر المجهود اللي ببذله في المقالات العلمية دي لناس أكتر، وبيعبر عن تقديركم للمجهود ده، ف متبخلوش به لو شايفين الجهد يستاهل

زائرنا الكريم : رجاءآ لاتنسى الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*